怕辣食麻辣

麻辣派對 (銅鑼灣)

利申：本人雖怕辣，但可食小辣，亦深深明白辣可提鮮、提味……人，是矛盾的動物。

多謝好同事帶我去食麻辣（明知我怕辣又要叫我去，明玩野…但我又去…）；自從在拱北食過第一次水煮魚，被它的麻辣、越辣越鮮所深深吸引後，卻一次都未食過麻辣；今次有好同事帶領，所以膽粗粗試一次。

平日去食野的好處就係唔洗同人迫，假日金百利樓下排隊上樓總有幾個蛇餅，今日即排即入lift。

一出lift門已經見到大大個名 麻辣派對 同 CHILI PARTY, 而且裡頭已經被坐滿滿。

睇menu先知，原來唔只得麻辣、小辣，唔辣既野食都有，真係唔洗擔心(好同事不停擔心我無野好食...應該係怕我唔賣單 XD)。Waiter／Waitress 落單時仲會問清楚我地要大辣定小辣。

因為其他朋友仔未到，我倆只好先叫啤酒同下酒小食：

七味雞脆骨 － menu寫辣但唔辣，炸得剛剛好，香脆得黎又無油，上面仲有d炸香左的蒜，送酒一流

川北涼粉 － menu寫明辣都叫，試左先知，呢個係麻多過辣，食完個咀會有麻麻的感覺，就似被牙籤拮下拮下咁。涼粉上面會有香蔥、肉末、花生，下面係麻辣醬油，食之前撈一手會均勻d。食涼粉時點上少少麻辣的醬油先有麻辣的香氣，涼粉本身彈牙滑口，不知不感就會一食x食。

涼拌秋葵 － 本人一向中意食秋葵，見到涼拌秋葵自然會叫；蒜末加上麻辣醬油，為秋葵添上陣陣的蒜香同香辣味，令簡單的秋葵味道變得豐富、更加吸引。

其他朋友就到才點主菜：

自選組合水煮味型 － 有朋友仔唔食魚咁點好？原來可以用水煮味加選其他輔菜，朋友仔話輔菜都要選些會吸辣油的，食落先有水煮味wow；比較特別的有豆腐角、水晶粉、高山娃娃菜同蒙古羊肉。

• 一開始仲以為豆腐角就係豆泡，原來似炸豆腐，相當地彈牙。
• 水晶粉真係必需品，加左直情變左做酸辣粉，多一種食法。
• 高山娃娃菜吸辣能力一流，咬了一口就成為了當晚的第一滴淚。
• 加了蒙古羊肉又是一絕，羊羶味加上麻辣立即提鮮。

水煮味雖然點了中辣，但麻辣度絕不簡單。

看相都應該想像得了。上檯時已經傳來陣陣麻新香，真是未食先流眼水口水。

黃燜雞鍋 － 是好同事極力幫我點的；想像不到，這裡除了麻辣，其他的都有一定水準；這 個雞鍋真的一食難忘，雞香、嫩滑，食下食下，差不多半鍋都是我食的。

酸辣土豆絲 － 比較特別的是土豆絲內裡勻有薑絲，每一口都帶有薑的香辣。

凍蜜語水果茶 － 解辣必備良品，杯內滿滿的瓜果，帶有季花的香氣，每一口都是甜甜的，入口即解辣。

賣單每人200左右，可以encore。